Kalibo Aklan———Waeo eon man nga turista ro gin-aresto it mga awtoridad matapos gumamit it pekeng RT-PCR test agud nga makapagbakasyon kunta sa Isla it Boracay.
Suno sa pamunuan it Provincial Inter-Agency Task Force, nag-abot ro waeong mga turista sa magkaseparadong adlaw ag lugar sa Isla.
Ko Pebrero 12 hay ginasugid nga gindakop ro ap-at sa sangka hotel ag pagka-aga, Pebrero 13 naaresto man ro ap-at nga iba pa sa sambilog pang hotel.
Ginasugid nga puro naghalin sa Metro Manila ro mga nadakpan nga turista.
Una eon sa andang natungdan nga mga hotel ro mga raya kat masayuran nga peke ro andang bitbit nga swab test matapos nga kumpirmahon it Saint Luke’s Hospital sa Metro Manila nga owa sanda nakapaguwa it RT-PCR test result para sa nasambit nga mga turista.
Presenteng naka quarantine ro mga turista sa Aklan Training Center ag nakataeanang ipaidaeum sa swab test.
Nakataeana man nga kasuhan it mga awtoridad ro mga suspek.
Nasayuran nga 6 nga turista ro nasampolan matapos nga kasuhan it Department of Tourism (DOT) it Falsification of Public Documents matapos madakpan nga nagpresinta it pekeng RT PCR test sa Caticlan Jetty Port ko buean it Enero.
Tatlo sa mga raya ro nagpositibo sa COVID-19.
Sa pihak nga parte, welcome kay Tourism Secretary Bernadette Romulo-Puyat ro direktiba it Department of the Interior and Local Government (DILG) sa Philippine National Police nga arestuhon ag kasuhan ro mga nagapangdaya it andang Covid-19 test results.
Nauna eon nga ginpahayag it DILG nga ro pag-eabag sa Republic Act No. 11332 ukon Mandatory Reporting of Notifiable Diseases and Health Events of Public Health Concern Act hay may penalidad nga P20,000 pesos hasta P50,000 pesos ukon pagkakulong nga sang buean hasta 6 buean depende sa desisyon it korte.
Madumduman nga ginpahayag it Malay Tourism Office nga ro may kabilugan nga 11,898 nga tourist arrivals sa Isla ko buean it enero ukon naga-average it 300 hasta 400 nga turista kada adlaw.
