KALIBO, Aklan — Daywa sa waeong ka pasahero ro padayun nga ginabueong sa Provincial Hospital matapos nga maninahan kat bungguan it kasunod nga delivery truck ro andang ginasakyan nga pampasaherong van sa national highway it Barangay Tagbaya, Ibajay.
Base sa report, magkasunod nga nagabiyahe ro daywang saeakyan sa highway sa lugar kat matabu ro insidente.
Ginasugid nga gulping naghinay ro daeagan it van nga ginamaneho ni Gabriel Mateo Angelo, 29, residente it Brgy. Poblacion, Numancia kasunod it pagpundo it sambilog pang van sa anang unahan bangud sa naka-park nga tricycle sa kilid it karsada.
Owa eagi naka-preno ro kasunod nga truck rason nga eubusan raya nga bumangga sa pampasaherong van nga naghalin sa Caticlan ag paagto kunta sa Kalibo.
Bangud kara, inapok sa pihak nga linya it karsada ro van nga hinapit ro anang side mirror it nagapa-abot man nga wing van truck.
Nag-angkon it bukoe ag nina sa nagkaeain-eain nga parte it eawas ro mga nakaeug nga pasahero nga insigidang gindaea sa Ibajay District Hospital nga ko ulihi hay ginsaylo sa Aklan Provincial Hospital.
Presenteng nakakulong sa Ibajay PNP ro driver it truck nga si Randy Betsaida, 34, it Balasan, Iloilo para sa nagakaigo nga disposisyon.
