Sangka 80-anyos nga eaeaki sa Australia ro nakalista it world record sa pagiging pinakamagueang nga football player sa bilog nga kalibutan.
Ginkumpirma it Guinness World Records nga si David Mudge, nga nagselebrar it anang 80th birthday ko nagtaliwan nga Enero 25 hay may edad nga 79 years and 89 days old kat nagpasakop imaw sa Northern Suburbs Football Association match para sa koponang Kissing Point Football Club kontra sa North Turramurra.
Naisipan nga mag-apply ni Mudge para sa world record title matapos nana nga masayuran nga ro previous record holder sa titulong “World’s Oldest Competitive Soccer Player” hay may edad eamang nga 73.
Suno sa mga tagadumaea sa Guinness, nakasueod sa andang mga guidelines ro ginpasa nga requirements ni Mudge, sambilog eon kara ro participation nana sa sangka full 90-minute game.
Nag-umpisa nga maging football player si Mudge ko 1958 kat nagpasakop imaw sa Northern Suburbs Football Association.
Ko dag-on 1974 hay naeakip imaw sa anang presenteng team nga Kissing Point Football Club.
Mag-eowas sa pagiging football player, naging club president ag treasurer man imaw kara.
May tiempo man nga imaw ro nagadumaea sa canteen ag barbecue it club.
Nalipay ag proud sa kaugalingon si Mudge bangud nga mag-eowas nga naeakip imaw sa Guinness Book of World Records, sambilog man imaw sa magapamatuod nga ro edad hay bukon it sabeag sa mga handum sa kabuhi.
