KALIBO, AKLAN — Padayon nga ginaimbestigahan it mga otoridad ro sangka 34-anyos nga eaeaki matapos nga gin-akusahan it pagpanghimueos ag pagbugbog sa sangka 88-anyos nga byudang lola sa Brgy. Candelaria, New Washington, Aklan.
Ro biktimang gintago sa pangaeang lola Clara hay nakaangkon it black eye, mga nina sa ueo ag iba pang parte it eawas.
Suno kay SPO2 Zoila Hilario, imbestigador sa kaso nga nasapwan eon lang ro biktimang nakaalsa ro duster ag uwa eon it suksok nga underwear nga nagakaya sa idaeom it katre sa sueod it computer shop nga ginapanag-iyahan it anang apo.
Sangka testigo sigon ro nakakita sa uwa anay ginpangaeaning suspek nga nagadaling magguwa sa nasambitang lugar.
Ro lola ro nagaserbeng caretaker it computer shop kabangdanan nga idto raya nagakatueog.
Nakataeana eon kunta nga magkatueog ro lola kat sudlon it suspek.
Nagsukoe sigon ro magueang samtang ginaubahan it underwear apang ginbayo pa sigon raya antes nga ginpatigayo ro maitom nga balak.
Nag-positibo sa resulta it medico legal examination nga ginhilabtanan ro lola.
