BALITA Espesyal– Sangka 88-year-old nga biyuda sa United States ro naga-isaeahanon nga residente sa ginakabig nga “smallest town in America”, ro Monowi, Nebraska.
Ko 2004, naging sangka residente eamang it Monowi si Elsie Eiler matapos mamatay ro anang asawa nga si Rudy.
Umpisa kato hay ginkinahangean nana nga dunganon nga buytan ro mga obligasyon bilang mayor, treasurer, clerk, secretary, librarian, cook, waiter ag bartender.
Sangka maumwad nga railroad town ko 1930s ro Monowi.
May una raya nga masobra sa 120 nga mga negosyo ag establisimento.
Apang naghaealin ro mga residente kara kat naging mahina ro pagpanguma ag nagsangkiri ro mga trabaho bangud sa pag-umwad it teknolohiya sa U.S.
Suno kay Elsie, bukon it hinangae ro pagiging mayor it Monowi, maabu imaw nga papeles nga kinahangean nga asikasuhong naga-isaeahanon agud nga magapabilin sa mapa ro anang banwa.
Bilang sangka taxpayer it anang lugar, ginabuwisan nana ro anang kaugalingon agud nga may pambayad sa tatlong poste it iwag ag linya it tubi.
Imaw man ro naga-asikaso it municipal road plan nga required kada dag-on para pondohan it U.S. government ro anang banwa.
Mag-eowas sa pagpadaeagan it kaugalingon nga banwa , ro sambilog pa nana nga gina-kasakuan hay ro anang negosyo nga Monowi Tavern, sangka bar and restaurant nga naga-serve it hamburgers, hotdogs ag beer.
Bukas raya it 6 days a week ag ginadayo it mga turista nga curious makita ro “smallest town in America” ag makilaea ro pinakasikat nga residente kara nga si Elsie.
