Sangka 9-year old nga ungang eaeaki sa U.S. ro naging world record holder bangud nga imaw ro nailistang pinakabatang nabugnutan it wisdom tooth!
Ko Abril 2021, nataeupangdan it dentista ni Ryan Scarpelli nga magkapatong nga nagatubo ro wisdom tooth ag molar sa ibabaw it tuo nga parte it anang bibig.
Insigidang ginpahisayod it dentista sa ginikanan ni Ryan nga kinahangean nga gabuton ro anang wisdom tooth agud nga magtubo it maayos ro molar.
Ro wisdom teeth hay ro ulihing permanent teeth nga nagatubo sa tawo.
Kaeabnan raya nga nagatubo sa edad nga 17 hasta 25.
Kaabuan hay kinahangean nga ipabugnot raya sa dentist bangud nga nagabunggo raya sa second molar tooth nga nagiging rason it pagsakit I t panga ag paghaeok it gums.
Masyado pang bata si Ryan para tubuan it wisdom tooth, rason nga nag-research online ro anang ina nga si Shelly Scarpelli kun normal baea sa sangka 9-years old ro makaangkon it wisdom tooth.
Sa anang research sa internet nasayuran nana nga bihira raya nga matabu apang normal ag indi dapat raya nga ikabaeaka rason nga ginpasugtan eon nana ro wisdom tooth extraction surgery it unga.
Bangud sa nasayuran nana nga impormasyon nga ro pinakabatang nailista it Guinness sa titulong “Youngest person to have a wisdom tooth extracted” hay 9-years and 339 days old, nagsumite si Shelly it application sa Guinness.
Sa edad nga 9-years old and 327 days, si Ryan eon ro pinakabag-ong record holder sa raya nga titulo./
