KALIBO, Aklan—Naka-eksperyensiya it pagbaha sa siyam nga mga banwa sa probinsiya it Aklan, adlaw it Domingo, Disyembre 1, 2024 matapos ro owa it pundo nga pag-uean bangud sa shearline.
Raya ro ginpahayag ni MJ Jizmundo, head it Provincial Disaster Risk Reduction and Management Office ukon PDRRMO-Aklan.
Ro mga banwa nga eubus nga naapektuhan it manabaw hasta kasarangan it daeum nga tubi-baha hay ro Altavas, Balete, Batan, Banga, kun sa siin ginasugid nga first time nga natabu sa barangay Poblacion, kamana man sa banwa it Kalibo nga owa nasarangan it mga drainage system ro kaabuon it tubi-uean; New Washington, Numancia, Makato ag Tangalan.
Sa pihak nga parte, naka-eksperiyensiya man it kasarangan nga landslides ro portion it Brgy. Cortes sa banwa it Balete, Brgy. Angas sa banwa it Batan, ag Brgy. Lupo ag Cabangila sa banwa it Altavas.
Ginasugid nga bangud sa dere-deretso nga pag-uean umpisa pa ko Sabado nga adlaw rason nga naghumok ro eugta .
Kapin sa 341 nga individual ro nag-evacuate sa bilog nga Aklan .
Raya hay ginaeakipan it 50 nga pamilya halin sa barangay Poblacion, Altavas samtang 128 nga individual man halin sa barangay Lumaynay sa nasambit nga banwa.
Nakalista man it kapin sa 10 nga evacuees sa banwa it Balete; 49 individuals sa Numancia, 10 sa New Washington, ag 4 sa Tangalan.
Sa mayad nga swerte suno kana ag insigida man nga nag-subside ukon naghubas ro tubi-baha kabi-i kadungan sa pagpundo it uean.
Sa makaron hay padayun nanda nga ginatipon ro mga ginapasa nga report it nagkaeain-eain nga MDRRMO angot sa andang assessment sa natabu nga pagbaha.
Samtang, balik eon sa normal ro biyahe sa mga national highways bandang alas-8 kabi-i rason nga owa eon it may nailistang mga stranded nga motorista mag-eowas sa mga tumirik nga saeakyan nga pilit nga nag-ubog sa tubi-baha.
Insigida man sigon nga naghueag ro mga natungdan nga municipal engineering office agud nga malimpyuhan ro mga karsadahon nga naapektuhan it landslide.
