KALIBO, Aklan—Padayun ro pagnaba it mga nailistang kaso it Coronavirus sa probinsya it Aklan.
Base sa pinaka-ulihing ginpagguwa nga datus it Aklan Provincial Epidemiological and Surveillance Unit, halin sa 50 ka mga sample nga ginpatigayun ko Oktobre 2, siyam eamang ro nagpositibo samtang 41 ro negatibo.
Raya hay nagresulta eamang 18 porsyento nga positivity rate.
Sa kabilugan, naga-abot eon sa 12,506 ro mga tinamaan it COVID-19 infection sa bilog nga probinsya umpisa nga magtuhaw ro pandemya.//Sa nasambit nga numero, 12,073 eon ro total recoveries matapos ro pagbueong ag quarantine procedure.
Samtang, ro 315 man ro binaiwan it kabuhi matapos dapuan it virus.
Sa makaron, 118 pa ro nabilin nga aktibong kaso it sakit nga ginakaeakipan it 93 nga naka-facility quarantine, 13 nga naka-home quarantine ag 12 nga admitted sa ospital.
Sa pihak kara, nagapadayun man ro pag-engganyo it health authorities sa publiko nga padayun nga magsunod sa ginapatuman nga minimum health protocols para makalikaw sa COVID-19.
