KALIBO, Aklan—Eubus ro pagkabaeaka makaron it sangka ina matapos nga haeos tatlong adlaw eon nga uwa nakauli ro anang onga.
Bangud kara, nagpaabot it panawagan sa mga pumueoyo si Coronacion Navarra, 90-anyos it Brgy. Catabana, Madalag kon sin-o man ro nakakita ukon nakasapopo sa anang ongang eaeaki nga may deperensya sa paino-ino ag nagapang edaron it 70 anyos.
Ginpahayag dugang ni Navarra nga posibleng nakasakay sa jeep ro anang onga paadto iya sa banwa it Kalibo rason nga nagpasimpalad raya nga magpabulig sa Bombo Radyo agud nga makauli kana ro anang onga.
Uwa suno kana nagapanakit ro anang onga apang kon intrimison hay nagasukoe raya rason nga eubus ro anang kabaeaka nga base may maeain nga matabo kana.
Gin-insister dugang it ginang nga uwa nagapanakaw ro anang onga kundi nagapangayo eamang raya it pagkaon.
Angot kara, nagahinyo imaw sa tanan kon sin-o man ro makakita hay insigida nga magpahisayod kana ukon sa pulisya bangud nga haeos ro andang baryo ag kaeapit banwa hay ana eon nga ginsuyod para eamang makit-an ro anang onga.
