Haeos 90% eon it mga alagang baboy sa barangay Briones, Kalibo ro nagkaeamatay bangud sa African Swine Fever (ASF).
Raya ro ginkumpirma ni punong barangay Rafael Briones it nasambit nga lugar.
Suno kana nga pagkatapos it selebrasyon it andang kapiestahan ko mayo 19 hasta 20 hay naging sunud-sunod ro pagkamatay it mga alagang baboy nga ginkadismaya ag ginkalugi it mga backyard hog raisers.
Kaabuan sigon sa mga residente idtu hay ro pag-alaga it baboy ro andang pangabuhian.
Ginpahayag ni kapitan Briones nga indi pa nanda matumod ro rason it madasig nga pagkamatay it mga baboy sa lugar.
Apang mabahoe ro andang pagpati nga bangud sa saea nga proseso it pag-eubong it nagmasakit nga sapat ro pinaka-ugat.
Ginpahayag dugang nga antes ro fiesta sa lugar hay maabu man ro nagbo-oe it permit to travel sa anang taeatapan, apang may pila nga umatras sa pagdaea it andang ginapakatay nga baboy sa slaughterhouse bangud nga mag-eowas nga mahaba sigon ro pila hay maeawig ro proseso , kun sa siin maabu nga mga dokumento ro ginapangayo.
Angot kara, padayun sigon ro panawagan idtu it mga natungdan sa tamang pagpilak it food waste ag apela sa mga naga alaga it baboy nga indi pagpaka-unon ro andang mga alaga it bukon it tamang pagkaon para sa baboy eabi eon ro mga damog bilang sabat sa ASF outbreak.
