May kabuuang 99 na opisyal ng Ombudsman na itinalaga sa pagitan ng Mayo 29, 2025 hanggang Hulyo 27, 2025 ang hiniling na magsumite ng kanilang courtesy resignation sa Miyerkules, Okt. 29.
Inilabas ang kautusan ni Ombudsman Jesus Crispin C. Remulla sa Office Order No. 347 na may petsang Oktubre 22, 2025.
Kabilang sa mga inutusang magsumite ng kanilang courtesy resignation ay dalawang assistant Ombudsman, apat na direktor, tatlong graft investigation officers (GIOs), 60 graft investigation and prosecution officers (GIPOs), at 30 assistant special prosecutors (ASP).
Ang kanilang Salary Grades ay mula SG 25 hanggang SG 29 o buwanang suweldo na P111,727 hanggang P180,492, ayon sa pagkakabanggit.
Bukod sa 99 na opisyal, hinimok din ni Remulla ang mga bagong hinirang na empleyado na may SG 24 (buwanang suweldo na P85,074) pababa na magsumite ng kanilang courtesy resignations bago ang Oktubre 29.
Si Remulla ay itinalaga ni Pangulong Marcos bilang Ombudsman noong Oktubre 7. Siya ang pumalit sa puwestong nabakante noong Hulyo 27 ng noon ay si Ombudsman Samuel R. Martires na nagsilbi sa kanyang pitong taong termino.
Noong Oktubre 20, sinabi ni Remulla na natuklasan niyang mayroong 204 na hinihinalang “midnight appointees” sa Office of the Ombudsman (OMB).
Nagbabala siya na kung ang 204 appointees na natanggap noong Hulyo ay hindi muling mag-aplay, sila ay ituturing na “midnight appointees.”
