KALIBO, Aklan—Uman nga nagpanawagan si Aklan 1st district Congressman Carlito Marquez sa publiko nga padayun nga magsunod sa mga health protocols nga makabalik eon sa normal nga pagpangabuhi.
Apang raya hay pinaagi sa ginatawag nga new normal.
Ginpamilit pa ni Cong Marquez nga hasta sa makaron hay owa pa nakabangon ro industriya it turismo ag agrikultura sa nasyon rason nga mabahoe nga problema sa ekonomiya ro ginapas-an it gobyerno.
Mabahoe man ro anang pagdayaw sa mga aklanon bangud sa pagsunod sa patakaran kapareho it social distancing ag pagsuksok it face masks, ag pagpabilin sa sueod it baeay kon owa man lang it importanteng panaw.
Mabahoe man sigon nga dapat pasaeamatan ro owa it nailistang kaso it local transmission it sakit.
Pabor man imaw nga mabuksan eon ro Kalibo International Airport ag Caticlan airport agud nga makahueag eon ro ekonomiya ag makabalik sa trabaho ro mga obrero.
Pinaagi sa uman nga pagbukas it isla it boracay sa mga local tourists halin sa western visayas ko hunyo 16, nagaeaum ro kongresista nga uman nga mabuhi ro lokal nga turismo.
