Kalibo Aklan ——-Kumpiyansa si Governor Florencio Miraflores nga makaguwa eon sa quarantine status ro probinsiya it Aklan sa Hunyo 30.
Bangud kara, posibleng magapaguwa imaw it bag-ong Executive Order engkaso nga ipaidaeum eon sa new normal status ro probinsya.
Suno kana nga iga-base sa siyensa ag mga datos ro andang magiging assessment nga igapaabot sa National Inter-agency Task Force.
Ginpamilit it Gobernador nga owa it nailistang local transmission sa Aklan ag kaeabanan sa mga naga-positibo sa sakit hay mga returning Overseas Filipino Workers.
Nagapati man imaw nga maisot eamang ro posibilidad nga maka-infect ro nag-positibo nga firewoman nga nag-eabag sa quarantine protocol ag nagtambong it despedida party sa Isla it Boracay .
Ginpaathag ni Miraflores nga sa idaeum it new normal, makaangkon eon it ligwa ukon free movement ro mga tawo , magabukas ro pilang mga nonessential businesses, apang hugut sa gihapon nga igapatuman ro preventive measures kontra COVID-19.
Iga-rekomenda man sigon nanda nga buksan eon ro daywang paeuparan sa Aklan para sa mga local stranded individuals , apang bawae pa ro mga local tourists mag-eowas sa mga taga Western Visayas .
Angot kara, nakataeana sanda nga makipagpueong sa mga airline companies agud nga matalakay ro mga scheduled flights nga pagahimuon.
Mag-eowas kara, posible man nga magbalik ro operasyon it pantalan sa Caticlan.
Tuyo kara nga mabuhi ro lokal nga turismo.
Sa makaron hay gina-estudyuhan pa nanda ro online application it health declaration card para sa madasig nga contact tracing engkaso nga may makasueod nga nag positibo sa sakit .
Sa uman hay gindayaw it Gobernador ro mga Aklanon sa pagsunod sa mga patakaran angot sa social distancing ag pagsuksok it face masks, kamana man ro pagpabilin sa baeay mag-eowas kon may importanteng panaw ag may emerhensiya .
Gin-insister kara nga nagapabilin ro virus sa palibot samtang owa pa it bakuna rason nga kinahangean gihapon ro hugut nga pagsunod sa mga health protocols.
