Kalibo Aklan —–Kumpara ko nagtaliwan nga mga selebrasyon it kapiyestahan ni Sr. San Juan de Bautista nga haeos mapuno ro beach front it Brgy. Tambak , New Washington, makaron hay haeos owa it tawo sa lugar.
Pasado alas-9 kaina it agahon hay bakante pa ro mga permanent nga cottage sa kilid it baybay.
Sa pihak kara, nakaplastar sa andang natungdan nga mga assignments ro mga rescuers ag volunteers it Municipal Disaster Risk Reduction and Management Office (MDRRMO) New Washington .
Kamana man ro mga tawuhan it Police Auxiliary Unit .
Nag-deploy man it speed boat ag fire truck sa lugar engkaso nga makaangkon it emerhensiya .
Sigidas man ro pagpatrolya it mga katapo it kapulisan sa beach area .
Ginpahayag dugang nga antes nga makasueod sa banwa hay maga-agi sa checkpoint , kun sa siin, maid-id nga gina-usisa ro numero it mga nakasakay sa mga saeakyan kon nagasunod sa social distancing, ro pagsuksok it face mask ag ro hugut nga ginabawae ro mga naga-edad it 21 anyos panaba ag 60 anyos pataas .
Bawae man ro angkas sa motorsiklo ag daywang pasahero eamang ro ginapasugtan nga makasakay sa mga tricycle .
Nataeupangdan man it Bombo News Team ro mga nakahilira nga manugbaligya it taeaba, apang ro mga sikat ag mga mabahoe nga kaean-an hay nagapabilin nga sarado.
Nauna eon nga gin-anunsyo ni New Washington Mayor Shimonette Francisco nga welcome sa andang banwa ro mga pumueuyu nga gustong magpaligos sa andang baybayon ag swimming pool area, apang may mga limitasyon kapareho it pagbawae sa pagbutang it mga tents, pag-inom it makahielong nga ilimnon ag pagpatukar it mabaskog .
Tuyo sigon kara nga malikawan ro paghapi-hapi ag pagtililipon it mga tawo .
