Kalibo Aklan ——Ginahueat pa it Local Inter-agency Task Force on COVID-19 ro direktiba it Department of Interior and Local Government (DILG) kon hin-uno pagapasugtan ro uman nga pag-uli it mga Locally Stranded Individuals (LSI’s).
Suno kay Provincial Health Officer 1 Dr. Cornelio Cuatchon Jr. nga ko domingo nga adlaw hay nagtapos eon ro daywang domingo nga moratorium ukon temporaryong pagsuspinde sa pagpa-uli sa mga LSIs nga nag-umpisa ko Hunyo 28 bangud sa nagatinaas nga kaso it COVID-19 sa Negros Occidental ag Iloilo City .
Sa makaron hay magahueat sigon sanda sa anuman nga mandu halin sa DILG, kun sa siin, nagapabilin sanda nga preparado .
Pila sa mga requirements agud nga maka-uli ro LSIs hay ro medical certificate, travel authority ag acceptance halin sa natungdan nga municipal LGU.
Mag-eowas kara, ginahueat pa sigon nanda ro National IATF kon RT-PCR test ukon rapid antibody tests ro iga-require sa mga LSI.
Mag-eowas kara, ginapadasig eon man ro pagbukas it molecular laboratory nga nahamtang sa Aklan Provincial Hospital .
Makaron nga adlaw it martes hay maga-abot ro mga representante halin sa Department of Health, Research Institute for Tropical Medicine (RITM) ag World Health Organization agud nga magpatigayon it assessment.
Posible suno kana nga sa Hulyo 31 hay magiging operational eon raya .
Sa sueod eamang it 24 hasta 48 oras hay masayuran eon ro resulta it RT-PCR test.
Samtang, nag-apela man si Dr. Cuatchon sa mga motorista nga sundon ro ginapatuman nga patakaran matapos nga pasugtan eon it IATF ro angkas sa mag-asawa ukon couples.
Dapat suno kana nga magsunod gihapon sa safety ag health protocol.
Kinahangean man nga may barrier sa tunga it rider ag ko anang angkas.
