Kalibo Aklan ——Ginklaru ni Aklan Governor Florencio Miraflores nga kinahangean eon makaron nga magpaidaeum sa swab testing ro mga residenteng maga-uli sa probinsiya it Aklan.
Base sa anang ginpaguwa nga Executive Order 029-B series of 2020 nga umpisa sa Hulyo 23, obligado eon nga mag-presentar it negatibong resulta it Real-time reverse Transcription Polymerase Chain Reaction (RT-PCR) test ro mga Locally Stranded Individuals (LSIs) nga maga-uli sa probinsiya halin sa mga DOH accredited testing laboratory .
Bangud sa pagtinaas sigon it kaso it coronavirus disease (COVID-19) sa Western Visayas nga kaabuan hay naghalin sa mga naga-uli nga LSI’s hay kinahangean nga magpatuman it hugut nga protocols .
Mag-eowas sa swab test result, ro presenteng protocols nga ginapatuman hay ro travel authority halin sa PNP, ag certificate of acceptance halin sa natungdan nga Local Government units nga may nagakaigo nga koordinasyon sa Barangay nga paga-ulian ag ro 14 diyas nga mandatory quarantine pag-abot sa andang destinasyon.
Ro mga naga-agi sa aklan nga mga LSIs halin sa Western Visayas hay required nga magsekyar it certificate of acceptance halin sa andang natungdan nga Provincial Government agud nga pasugtan nga makasueod sa probinsiya pinaagi sa paeuparan ukon pantalan.
Nagpaabot eon sigon sanda it abiso sa mga airline ag shipping companies nga kon bukon it kompleto ro dokumento it mga LSI’s hay indi pagpasakyon .
Kapareho man sigon ro nasambit nga patakaran sa mga returning Overseas Filipino Workers .
Gindugang pa ni Governor Miraflores nga owa man it pagbag-o sa mga restrictions eabi eon sa oras it curfew nga alas-9 it gabi-i hasta alas-5 it aga-aga kamana man nga bawae gihapon nga makaguwa ro mga naga-edad it 21 anyos panaba ag mga senior citizens .
Required man gihapon ro pagsuksok it face mask, pirmeng pag disinfect ukon paghugas it alima ag pag obserba sa social distancing .
Ro Aklan hay owa it local transmission ag sa mga 12 positive cases hay owa it namatay ag puro nakarekober eon.
