Kalibo Aklan ——–Nagapangatubang sa kasong Frustrated Homicide ro sangka 27 anyos nga construction worker matapos nga anang ginbuno ro sangka ginang sa Brgy. Old Buswang, Kalibo.
Suno kay P/MSgt. Emil Milleondaga it Kalibo Police Station, insigida nga nadakpan ro suspek nga si Michael Dela Cruz matapos nga ginkabuligan it mga residente sa lugar nga mapuko imaw kasunod sa anang pagbuno sa biktima nga si Helen Flores, tubong banwa it Malay apang presenteng nagapangamuhan sa pamilya ni Nemesia Delos Reyes sa nasambit nga lugar.
Ginpahayag dugang ni Milleondaga nga pursigidong magpasaka it kaso ro pamilya it biktima.
Nauna kara, naghueam sigon it pala si Dela Cruz sa mga Delos Reyes apang uwa imaw pagpahueama rason nga sa anang pagbalik hay ana nga ginpaukpan ro ginang nga nagapanghawan ag mismong ginabuytan kara nga grass cutter ro ginamit it suspek sa pagbuno kana.
Mag-eowas sa grass cutter, narekober dugang sa posisyon ag kontrol it suspek ro nagkaeain-eain nga klase it siyaw.
Nasayuran nga antes natabo ro insidente it pagpamuno hay nauna eon nga ginkatay it suspek ro kanding ag mga manok it anang kaeapit baeay kamana man ginpang-eantas kara ro mga pananom nga tinuean-on sa lugar.
