Kalibo Aklan ——–Igapatuman it Land Transportation Office (LTO) ro anuman nga direktiba it Department of the Interior and Local Government (DILG) angot sa pagbutang it protective barrier sa mga motorsiklo bilang requirement agud nga pasugtan ro pag-angkas it mag-asawa ukon couple.
Suno kay Engr. Marlon Velez, head it LTO-Aklan nga kinahangean nanda nga sundon ro anuman nga guidelines it DILG .
Angot kara, ginlaygayan man nana ro mga motorcycle riders nga indi lang anay magpa-angkas ro mga owa it barrier agud nga makalikaw sa multa bangud sa pag-eabag sa quarantine law ag excess passenger.
Ro angkas hay aplikable eamang suno kana sa mag asawa ukon couple ag bukon it kaibahan ro iba pang miyembro it pamilya .
Sa pihak kara, aminado ro LTO Head nga peligroso ag takaw aksidente ro pagbutang it nasambit nga barrier.
Nauna eon nga ginkontra it mga motorcycle riders ro guidelines it DILG bangud nga owa sigon it rason agud nga butangan pa it barrier ro tunga it mag-asawa nga magka-angkas sa motorsiklo bangud nga haeos naga iba man sanda sa sangka baeay.
Bastante eon sigon ro pagsuksok it helmet bilang proteksyon bangud nga may kaibahan man raya nga face shield bilang proteksyon.
Gindugang pa ni Engr. Velez nga sa oras nga ipatuman ro full implementation kara, pagatigsambilugon nanda ro pag-usisa sa mga dokumento nga iga presentar agud nga mapamatud-an nga mag asawa ukon couple ro magka-angkas.
Apang ro mga pruweba ukon requirements nga gina-usoy sa couple hay padayun pa nanda nga ginahueat ag ginaklaru halin sa National Inter-agency Task Force .
Mag-eowas kara, paga-usisaon man ro barrier kon matibay bangud nga indi pwede ro portable .
Tuyo sigon it nasambit nga polisiya nga makalikaw sa makamaeatay nga virus ro publiko .
