Kalibo Aklan ——-Pormal eon nga ginturn-over sa Civil Aviation Authority of the Philippines (CAAP -Aklan) ro imaging termal scanners ag digital thermometers nga gindonar it sangka pribadong foundation ukon non government organization pinaagi sa opisina ni Aklan Second District Congressman Teodorico Haresco.
Ginpabugae ni Cong. Haresco nga ro nasambit nga mga kagamitan hay makabig nga advance technology kon sa siin insigida kara nga madetect ro body temperature it mga naga-agi sa sueod mismo it Kalibo International Airport.
Inde eon sigon kinahang-ean nga paeapitan ro sangka indibidwal agud nga maboe-an it body temperature nga imaw ro nagapangunang requirements makaron maskin sa mga establisyimento bilang pangaman sa COVID-19 infection.
Ginpahayag dugang ni Cong. Haresco nga ginaamatan eon it pag level up ro mga kagamitan sa paeoparan bilang preparasyon sa uman nga pagbukas kara sa international flights engkaso nga pasugtan eon it gobyerno.
Apang sa makaron hay domestic flights pa eamang ro ginapasugtan nga makahugpa sa paeoparan sakay ro mga locally stranded individuals ukon LSI, ROF’s ag APOR.
Samtang sa pihak nga parte, ginpahayag mat-a ni Atty. Shelwyn Ibarreta nga prayoridad anay makaron it gobyerno probinsyal nga maging operational ro molecular laboratory nga nakahamtang sa Provincial Hospital antes nga pasugtan nga magcater it international flights.
Ginpahayag dugang ni Atty. Ibarreta nga kon may molecular laboratory eon ro Aklan hay inde eon kinahang-ean pang maghueat it pilang adlaw antes nga masayuran ro confirmatory result it suspected COVID-19 patient bangud nga sa oras nga buksan ro international flights hay may posibilidad nga magapadueong sa Isla it Boracay ro mga foreign nationals.
