Kalibo Aklan ——–Nagahueat pa it abiso ro Civil Aviation Authority of the Philippines (CAAP-Aklan) halin sa mga airline companies angot sa posibleng kanselasyon it andang mga naka-schedule nga domestic flights sa Kalibo International Airport.
Raya ro ginpahayag ni CAAP-Aklan Manager Engr. Eusebio Monserate Jr., kasunod it uman nga pagbutang sa Modified Enhanced Community Quarantine (MECQ) ro NCR, Bulacan, Cavite, Laguna ag Rizal.
Ginpasiguro pa ni Engr. Monserate nga pagasundon ro anuman nga igapaguwa nga guidelines it parehong lokal ag National Inter-agency Task Force .
Posible suno kana nga makaangkon it kanselasyon it mga domestic flights halin sa Manila.
Ginlaygayan man nana ro mga pasahero nga antes nga magbiyahe hay makipag-angot anay sa andang natungdan nga airline companies agud nga malikawan ro aberya .
Samtang, ginklaru pa it CAAP nga owa pa ginapasugtan makaron ro international flights nga makasueod sa mga nagapangunang paeuparan sa nasyon mag-eowas sa mga repatriation, medical ukon cargo flights .
Madumduman nga gin aprubahan ni Pangueong Rodrigo Duterte ro rekomendasyon it Inter Agency Task Force kasunod it panawagan it grupo it mga medical frontliner nga ibalik ro ECQ sa NCR ag mga kaiping nga probinsiya kun sa siin, raya hay igapatuman umpisa makaron nga adlaw Agosto 4 hasta Agosto 18.
