Kalibo Aklan——–Ginduea ni Numancia Mayor Jeserel Templonuevo ro pagkabaeaka it anang mga nasakupan matapos nga mamatay sa coronavirus disease (COVID-19) ro sangka 48 anyos nga babaye halin sa nasambit nga banwa.
Ginklaru kara nga ro pasyente hay namatay ko Agosto 7, 2020 bangud sa stage 4 nga cancer ag insigidang gin-cremate.
Suno kana nga ginkasubo nanda ro ikaywang kaso it COVID-19 nga nailista sa andang banwa ag kauna-unahan nga namatay sa bilog nga probinsiya it Aklan.
Nauna kara, nagbiyahe raya sa Iloilo halin sa Aklan ko Hulyo 29, 2020 para sa anang medical check up sa anang ginabatyag nga sakit.
Gindaea raya it uman sa St. Paul Hospital ko Agosto 2 hasta 3, 2020 halin sa Aklan, apang nag-agi pa sanda sa Antique antes nga nagderetso sa Iloilo city .
Gindugang pa ni Mayor Templonuevo nga ro pasyente hay namatay sa nasambit nga ospital.
Mabahoe man ro anang pagpati nga bukon it sa Aklan nabo-oe nana ro impeksyon.
Nasayuran nga nauna raya nga ginpaidaeum sa COVID-19 Antigen test ag negatibo ro resulta.
Bangud nga bumagsak eon ro anang immune system, nagpatigayon it nasopharyngeal swab sa pasyente ko Agosto 4 ag nag-positibo imaw sa COVID-19 sa resulta nga ginpaguwa ko Agosto 6.
Nakataeana man nga igapaidaeum sa RT-PCR test ro mga naka-angkon it direct contact sa pasyente nga makaron hay naka strict home quarantine.
Kadungan kara, uman nga ginpadumdum ni Mayor Temploneuvo sa mga taga banwa it Numancia ro hugut nga pagsunod sa minimum health protocols kapareho it pirmeng pagsuksok it face mask, paghugas it alima ag physical distancing .
Sa pihak nga parte, ginpasaeamatan man ni Mayor Templonuevo ro andang mga Barangay Health Emergency Response Team (BHERT’s) bangud sa aktibong pag-monitor sa mga Locally Stranded Individuals nga mas pang nagbuhos matapos nga maghingabot sa pag-uli kat owa pa gin require ro RT-PCR test sa mga raya agud nga maka-uli sa probinsiya .
Ginkasubo man nana bangud nga haeos punuan eon ro andang ligtas COVID Center .
