Kalibo Aklan ——Gina-welcome it Department of Education (DepEd-Aklan) ro uman nga pagpaiway it DepEd national sa pagbukas it klase para sa school year 2020-2021 sa Oktobre 5, 2020.
Suno kay Schools Division Superintendent Dr. Miguel “Mac” Apusin it DepEd -Aklan nga andang pagasundon ro para sa ikamayad it nga estudyante ag manugturo.
Nasayuran nga unang nagpagguwa it statement si DepEd Sec. Leonor Briones nga ro nasambitan nga tikang hay naging rekomendasyon nanda kay Pangueong Rodrigo Duterte nga gilayon man nga gin-aprubahan it pangueo.
Bangud kara, nagpagdesisyunan nga indi lang anay ipadayun ro pagbukas it klase sa Agosto 24.
Raya hay bangud sa uman nga pagbalik it pilang ka mga lugar sa modified enhanced community quarantine kaeakip eun ro Metro Manila.
Sa pihak kara, uman nga gin-engganyo ni Dr. Apusin ro mga manugturo nga magpreparar sa uman nga pagbukas it klase.
Samtang, magapadayun man ro mga dry-runs, orientations ag delivery it mga learning modules.
Ginaeauman nga raya eun ro pinakaulihi ag pinal nga desisyon angot sa pag-umpisa it school year makarun nga dag-on .
Madumduman nga maga-umpisa kungta sa Agosto 24 ro orihinal nga petsa it pagbukas it klase ag magatapos sa Abril 30 sa masunod nga dag-on.
Apang may natabong pagbag-o bangud sa pandemya nga daea it COVID-19 sa nasyon.
Limitado man ro hu-eag it mga tao ag indi eun pwedeng magtumpok-tumpok ro mga manugturo ag estudyante.
Maskin nga naka-work-from-home hay ginahimo it mga raya ro tanan para sa pagbukas it klase kung sa siin ‘blended learning’ eun ro magiging sistema.
Raya eun sigon ro ginatawag nga ‘new normal’ sa edukasyon bangud sa nagkaeain eain nga klase it pagtuon kapareho it online classes, klase gamit ro mga programa sa DepEd TV ag radio ag ro mga learning modules nga igapanudpod sa mga inunga.
Gin-insiter dugang nga bukon it pabor ro DepEd ag maging si Pangulong Rodrigo Duterte nga magpatigayon it face-to-face classes hasta nga owa pa it bakuna kontra sa COVID-19.
