KALIBO, Aklan—Nagkasugot ro mga senador ag kongresista nga hueay-hueayon eon lang ro P10 billion nga gintaeana nga pondo agud nga mabuligan ro bagsak nga tourism industry sa nasyon.
Raya hay kasunod it pag-apruba sa ginaproponer nga Bayanihan To Recover as One Act o Bayanihan 2.
Suno kay Aklan 2nd District Rep. Teodorico Haresco Jr. nga mabuhay nga gindebatehan it bicameral conference committee ro isyu angot sa nasambit nga pondo.
Apang ko ulihi hay ginkasugtanann nanda nga himayon raya sa mga masunod.
Ro P1 bilyon hay para sa imprastraktura sa mga tourist destination sa nasyon nga pagabuytan it Department of Public Works and Highways (DPWH).
Samtang ro P6 bilyon hay igapautang sa mga maintok nga mga kumpanya sa tourism industry ag ro P3 bilyon hay ayuda sa mga trabahdor nga naduea-an it trabaho nga una sa industriya it turismo.
Gindugang pa ni Haresco nga gusto sigon it mga senador nga direkta raya nga ipautang sa mga pribadong kompanya sa tourism industry nga nagsarado bangud sa covid 19 pandemic, kun sa siin, pagadumaeahan it Department of Tourism.
Apang gina insister it mga kongresista nga ipasueod ro pondo sa Tourism Infrastructure and Enterprise Zone Authority (TIEZA) agud nga makahimo it maabu nga mga trabaho samtang nga mabudlay pa nga maka engganyo it mga dumueuong nga turista sa tunga it ginapangatubang nga pandemya.
Ro discounted loans suno kana hay igapa-agi sa Development Bank of the Philippines ukon DBP, Land bank ag Department of Trade and Industry ukon DTI ag SB Corporation.
Kan-o eamang hay ginrapitikan it Senado ro P165.5 bilyon nga Bayanihan 2.
