Kalibo Aklan——–Ginauean makarun it kontribersiya ag pilang pangutana ro 2018-2019 nga pondo it Parent-Teacher Association (PTA) it Naile National High School.
Gina-alegar nga ro kapin sa 19, 000 pesos nga pondo hay ginbuoe ni dating principal Portia Cunanan nga owa it pahanugot maghalin sa mga miyembro it nasambit nga asosasyon.
Suno kay Naile National High School PTA Vice President Reb Alair, naistoryahan sigon sa andang ginpatigayun nga meeting ko nagtaliwan nga Oktobre 2018 ro mga proyekto nga pagabutangan it andang natipon nga pondo.
Bilang bise presidente sigon it asosasyon ginsuhestiyon kara nga gamiton ro pondo sa pagbakae it sound system bangud pwede sigon rayang magamit kung may gina-organisa nga programa ro eskwelahan kamana man generator set ag CCTV camera bangud nagapati imaw nga mabahoe ro maibulig kara sa mga estudyante, manugturo ag ginikanan.
Samtang, ginsushestiyon mat-a sigon ni Mrs. Cunanan bilang Principal sa dato nga panyempo nga itaeana ro pondo sa pag-repair it bubungan it andang school library.
Aminado man raya nga nakabuoe it maabo nga boto ro gustong iduso nga proyekto it Principal.
Gin-insister kara nga owa it kinamatarong nga magbuyot sa pondo si Mrs. Cunanan bangud owa man raya it kontribusyon sa andang naging koleksyon.
Ro mas ginaeain sigon it buot ni Alair hay kat matueopangdan kara nga naubos eon ro pondo apang owa pa natapos ro proyekto.
Sa pihak nga parte, ginapahayag ni Mr. Vicente Cabales Officer-in-charge (OIC) it Naile National High School nga nag-umpisa ro konstruksyon it bubungan it andang library ko Disyembre 2019.
Gindugang pa kara nga naghambae sigon kana si retired principal Portia Cunanan nga igapadayun kara ro anang naumpisahan nga proyekto maskin nga owa eon imaw sa pwesto.
Samtang, ginpanindugan mat-a ni Naile National High School PTA President Nida Belinario nga owa it natabo nga anomaliya ag korapsyon sa pondo it andang asosasyon bangud may mga dokumento sigon sanda nga nagapakita it tanan nga naging transaksyon nga gin-adtunan it nasambitang kwarta.
