Kalibo Aklan ———Sangka eaeaki nga gina-alegar nga alcoholic ro nasapwan nga owa eon it kabuhi sa papag nga anang gina-eugban sa sangka abandonadong lote sa prente it Kalibo public market sa Roxas Avenue Extension, Barangay Andagao Kalibo .
Base sa report, bandang alas-7:00 kaina it agahon kat madiskubre ro bangkay ni Ivan Iligan y Retulin, alyas “boy lapad”, 37-anyos, manugpakalimos, ag residente it Sitio Talangban, Brgy. Camaligan, Batan, apang temporaryong naga-istar sa nasambit nga lugar .
Si alyas butsoy, sambilog man nga nagapakalimos at kainuman ni Iligan ro nakadiskubre sa bangkay it biktima.
Suno kay butsoy nga dating kargador sa tindahan ro biktima, apang ko ulihi hay nagpakalimos eon lang , kun sa siin , ro anang kwarta hay pirme kara nga ginakabakae it aeak ag owa nagakaon-kaon .
Haeos daywang buean eon sigon nga owa imaw nakaguwa sa anang gina-eugban .
Ginapatihan nga bangud sa anang pagiging alcoholic ro naging rason it anang pagkamatay .
Samtang, nagapati man ro anang ina nga si Mrs. Elsa Ramos nga owa it natabong “foul play” matapos nga madiskubre ro bangkay it anang unga.
Nasayuran nga haeos butot-balat eon ro biktima kat nakita nga owa eon it kabuhi .
Gindugang pa ni nanay eElsa nga si Ivan ro kamanghuran sa anang tatlong unga sa unang asawa .
Umpisa suno kana nga ginpatay ro andang ama it ana man nga igkampod hay owa eon it naging direksyon ro kabuhi ni Ivan .
Hasta nga nakita eon lang nanda raya nga nagapakalimos sa guwa it sangka mall ag nagapinahilong .
Naga-uli sigon raya kana kon nagamasakit, apang kon magmayad ro anang pamatyag hay nagabalik eon man sa Kalibo .
Nagakasubo man ro ginang bangud nga owa nagapamati kana ro anang unga maskin nga pirme nana raya nga ginahambaean.
