Kalibo Aklan ——–Bukon it pabor si Kalibo Mayor Emerson Lachica nga magpatuman it lockdown sa bilog nga banwa it Kalibo.
Raya hay sa tunga it padayu nga pagtinaas it kaso it 2019-Coronavirus disease (COVID-19), mag-eowas pa sa nailistang kauna-uhanan nga kaso it local transmission .
Suno kay Mayor Lachica nga bukon it advisable ro lockdown sa bilog nga banwa bangud nga maga-suffer kara it husto ro ekonomiya nga makaron hay amat-amat eon nga nakakabangon .
Mas pabor sigon imaw sa granular lockdown nga makaron hay padayun nga ginapatuman sa daywang sitio sa Barangay Bakhaw Norte Kalibo nga ginaeakipan it Sitio Libuton B ag Sitio Ilaya samtang owa pa nagguwa ro resulta it swab test it mga residente nga nakaangkon it direct contact sa sangka staff it Aklan Provincial Hospital nga nagpositibo sa sakit .
Bangud nga ginpaeawig ro andang curfew hour nga naga-umpisa alas-6 it gabi-i hasta alas-6 it agahon, ro mga Barangay officials ro naga-asikaso sa mga ginabakae nga kinahangeanon it mga residente eabi eon ro mga pagkaon .
Ginpahayag dugang nga maskin nga bukon it pabor sa lockdown, ginpahayag ni Mayor Lachica nga nakadepende gihapon ro pagdesisyon sa local inter-agency task force against COVID-19 kamana man sa pag-inabu it tawong positibo sa COVID-19 bangud nga indi raya pwedeng mapabay-an.
Samtang, agud nga makalikaw sa mas pang pagkalhit it sakit, gin engganyo ni Mayor Lachica ro tanan nga hugut nga sundon ro ginapatuman nga minimum health protocol it Department of Health (DOH)partikular ro pirmeng pag disinfect pinaagi sa paghugas it alima ukon paggamit it alcohol , pagsuksok it face mask ag face shield , physical distancing ag likawan ro mga mass gathering kapareho it mga lamay sa mga namatyan , birthday parties , fiesta ag iba pa.
Nag-apela man imaw nga indi magguwa it mga baeay kon owa man lang it importanteng paeanawon.
