Kalibo Aklan ——–Ginpaathag ni Kalibo Sangguniang Bayan member Agosto Tolentino nga may guidelines ro National Inter Agency Task Force kaangot sa pagpatuman it lockdown.
Raya hay kasunod sa panawagan it pila ka mga pumueoyo sa banwa it Kalibo nga magpatuman it lockdown ro lokal nga gobyerno it Kalibo kasunod sa kumpirmasyon nga may local transmission it sakit nga coronavirus disease ( COVID-19).
Suno kana, inde pwede magpatuman it lockdown sa sangka lugar kon bukon it mataas ro kaso nga nailista mag-eowas eon lang kon nakasueod raya sa guidelines it National IATF.
Nasayuran nga daywang ka sitio sa Brgy. Bakhaw Norte, Kalibo ro ginpaidaeom sa granular lockdown matapos nga nagpositibo sa nasambit nga sakit ro sang laboratory staff it Aklan Provincial Hospital nga residente it nasambit nga lugar.
Samtang sa pihak nga parte, suno mat-a kay Executive Assistant to the Mayor Mr. Basil Tabernilla, inde basta-basta magpatuman it lockdown ro alkalde it banwa bangud nga maabo pa ro kinahang-ean nga ikonsidera antes raya nga himuon.
Ginpahayag dugang nga kinahang-ean nga maid-id ro pag-istudyo ko mga opisyal it banwa antes magdesisyon it nasambit nga tikang.
Sambilog eon sigon nga ginakonsidera kara hay ro resources kon bastante nga makata-o it ayuda sa mga pumueoyo nga magiging apektado it lockdown.
