Kalibo Aklan ———Ginbuksan it Government Service Insurance System (GSIS) ro COVID-19 Emergency Loan program para sa mga miyembro ag mga pensioners.
Suno sa GSIS ro loan program hay hasta sa Dec. 27 it presenteng dag-on.
Ro uman nga pagbukas it GSIS it pautang hay matapos nga pirmahan it Pangueong Rodrigo Duterte ro Proclamation No. 1021 nga nagamando para sa extension it state of calamity sa bilog nga nasyon bangud sa pandemic.
Ginreport ni GSIS President ag General Manager Rolando Ledesma-Macasaet nga nagtaeana sanda it P43 billion sa nasambitang programa.
Ro mga kuwalipikadong borrower sa maskin may una pang emergency loan hay puwedeng makautang it hasta sa P40,000 para bayaran ro andang naunang utang sa GSIS.
Sa mga uwa it utang hay kuwalipikado sandang mag-loan it P20,000.
