Kalibo Aklan——-Bangud sa anang mga tattoo nga halin sa ueo hasta sa siki, napahalin sa pagturo sa kinderganten ro sangka 35-anyos nga eaeaking teacher sa Paris, France kat magreklamo ro ginikanan it sangka unga nga estudyante.
Base sa report, mag-eowas nga bordado ro anang eawas, may tattoo man sa uyahon ag maskin sa dila si Sylvian Helaine.
Ginpakulayan man nana it itom ro anang mga mata.
Apang ko nagtaliwan nga dag-on, nagreklamo ro ginikanan it sangka kindergarten pupil sa Docteur Morere Elementary School sa Palaiseau, kat mahadlok sigon ag magpanamgo it maeain ro 3-dag-on nga unga nanda matapos nga makita si Helaine.
Ag pagkatapos it pilang buean, ginbawaean eon si Helaine nga magturo sa kindergarten apang padayun imaw nga makaturo sa mga Grade 6 pataas.
Suno sa tagapaghambae it local education authority, ro desisyon hay nabilog bangud nga nahadlok sigon ro mga estudyanteng grade 6 panaba sa itsura ni Helaine.
Sa pihak it mga natabu, gusto ni Helaine nga magpabilin sa pagturo bangud nga palangga nana ro anang trabaho.
EEdad 27 sigon si Helaine kat mag-umpisa imaw nga magpa-tattoo samtang nga nagaturo sa sangka private school sa London kat makaexperiensoya imaw it “existential crisis.”
Umpisa kato hay naging kaparte eon it anang kabuhi ro magpa-tattoo.
Nagaeaum imaw nga mabaton man it mga estudyante ro mga tawo nga kapareho nana nga kakaiba sa mga ordinaryong nakikita.
