KALIBO, Aklan—Kaabuan sa mga Filipino community sa Estados Unidos hay suportado si US president Donald Trump.
Suno kay Mr. Cha Reyes, tumandok it Banga ag haeos 24 anyos eon nga naga-istar sa Virginia, USA nga nagustuhan it mga Pinoy ro mga patakaran ni Trump partikular ro anang pagdumaea sa ekonomiya.
Ginpabalik sigon nana ro mga mabahoe nga US company sa andang nasyon agud nga makaangkon it trabaho ro maabu nga mga Amerilkano ag indi magtinamad nga nagasalig eamang sa ayuda it gobyerno.
Ginpull-out man sa merkado ro mga “china made” products bangud sa isyu it quality control ag ginpabalik sa andang natungdan nga mga nasyon ro undocumented kaibahan eon ro pilang mga Pilipino nga ginakabig nga mga TNT.
Samtang, gindugang pa ni Reyes nga ro Virginia hay ginatawag nga blue state ukon balwarte ni dating Vice President Joe Biden, apang owa pa raya it kasiguraduhan bangud nga kaeabanan sa mga residente hay mahipos eamang kon sin-o ro andang pagasuportahan.
Ginhalimbawa kara ro natabu ko 2016 nga elections sa tunga ni Trump ag Hillary Clinton nga maskin leading sa election survey ro democrts sa Virginia hay nagpangibabaw gihapon si Trump sa actual nga adlaw it eleksyon.
Nasayuran nga magkaiba ro sistema it eleksyon sa Pilipinas ag Amerika.
Bangud sa Pilipinas, daog ro kandidatong nakabo-oe it pinakamaabung boto, apang sa Amerika, natunga sa ap-at nga parte ro eleksyon ag nakasalalay ro resulta kara sa electoral votes ukon boto it grupo it electors kada estado.
