Balitang Espesyal —— Sangka doktor ro nagreklamo sa mga awtoridad sa India matapos imaw nga maloko it daywang eaeaking nagbaligya sigon kana it ginasugid nga magic lamp ni “Aladdin” ag may magapakita sigon nga “Genie.”
Ro kantidad it lampara hay katumbas it P4.5 milyon pesos.
Base sa report, nagdangop sa mga awtoridad sa Uttar Pradesh si Laeek Khan matapos nana nga madiskubre nga naisahan imaw it tawong nagabaligya kana it lampara sa balor nga naga abot sa pitong milyong rupees.
Ginpahayag ni senior officer Amit Rai nga daywang eaeaki ro naaresto ag gina-usoy ro sambilog pang kakunchaba sa pagpangloko.
Nakabaehag sigon sa reklamo it biktima nga ginpaeapitan imaw it sambilog sa mga suspek nga nagpakilaeang “occultist” ukon may kakaibang gahum.
Nahimo man sigon kara nga makapaguwa it “genie” halin sa lampara.
Kat hinyuon sigon ni Khan ngabuytan ro genie ukon maiuli ro lampara, nagpamalibad sigon ro eaeaki bangud nga basi nga mapahamak imaw.
Nagresulta ro andang pag istorya sa pagbakae it biktima sa lampara bangud sa pagtau sigon kara it suwerte kana suno sa suspek.
Ko ulihi hay na-realize sigon ni Khan nga ro nakita nana nga “genie” hay sambilog man sa mga suspek nga nadakpan.
