Kalibo Aklan ——-Nagapati si Sangguniang Panlalawigan Member Atty. Harry Sucgang it unang distrito it Aklan nga nakasentro gihapon sa kwarta ag bukon it sa plataporma it partido ro hinampang sa maabot nga eleksyon sa nasyon .
Suno kana nga kinahangean nga maging mapagbantay ro mga pumueuyu sa maabot nga eleksyon .
Dapat man sigon nga mabugtaw ro mga tawo nga indi makaangkon it pag-asenso ro sangka nasyon kon eapnaag sa gihapon ro korapsyon .
Nasanay sigon ro mga botante ag maskin ro mga pulitiko nga kada eleksyon hay nagabaha ro campaign fund.
Ro mga botante sigon hay nagasalig sa makadali nga grasya nga ginatau it kandidato sa tiempo it kampanya ag antes nga mag-abot ro eleksyon .
Samtang ro mga pulitiko hay nagapati nga kon bastante ro kwarta it partido hay mabahoe ro chansa nga magadaog .
Ro reaksyon ni Board Member Sucgang hay kasunod it napabalita nga nakipagsanib pwersa eon si Aklan First District Congressman Carlito Marquez sa grupo ni Aklan Governor Florencio Miraflores .
Mabuhay eon sigon nana raya nga nabatian , apang owa pa it kumpirmasyon halin sa kongresista .
Engkaso sigon nga makaangkon it kamatuoran, owa sanda it mahimo kundi nga pahauman ro maabot nga eleksyon agud nga mas pang mapabaskog ro andang grupo .
Sa pihak nga parte, kipo pa ro bibig ni Atty. Sucgang kon magapadaeagan raya bilang Gobernador katandem si dating Makato Mayor Jun Legazpi.
