Kalibo Aklan ——Suportado it Department of Public Works and Highways (DPWH) Aklan ro mandu ni Pangueong Rodrigo Duterte nga imbestigahan ro alegasyong kurapsyon sa gobyerno.
Suno kay Assistant District Engineer Leo Beonat it DPWH-Aklan nga ginasuportahan nanda ro kampanya it Pangueo nga tuldukan eon ro anomaliya sa gobyerno.
Ginpahayag dugang nga maskin sigon si DPWH secretary Mark Villar hay nagpromisa nga paga-obrahon it andang ahensya ro andang parte agud nga malimpyuhan ro andang linyada.
Samtang, ginpasiguro man nana nga owa it ghost project sa probinsiya rason nga owa sanda nagakabaeaka sa ginakasa nga imbestigasyon sa DPWH it ginbilog nga mega task force .
Aminado man imaw nga maskin nga may mga proyekto nga na-delay bangud sa problema sa pondo, apang raya tanan hay ginatapos.
Sa pihak nga parte, ginpamalibaran ni Engr. Beonat nga may koneksyon sa mandu nga imbestigasyon ni Pangueong Duterte ro pagsaylo sa ibang district office kay dating DPWH district Engineer Noel Fuentebella.
Suno kana nga natiempo eamang ro pag-transfer kana sa Palawan .
Ro kada district Engineer suno kana hay may limang dag-on eamang nga termino.
