Balitang Espesyal—– Ginpasiguro ni Prime Minister Giuseppe Conte sa mga unga nga maga-abot si Santa Claus sa Kapaskwahan sa pihak it lockdown sa nasyon.
Sa anang Facebook post, ginpahayag ni Conte nga ginpasiguro sigon kana ni Santa Claus nga nakabo-oe eon imaw it international travel certificate rason nga pwede eon imaw nga makabiyahe sa maskin siin man nga parte it kalibutan agud nga makapanupod it mga regalo sa mga unga.
Raya hay matapos nga makabaton it sueat sa sangka limang dag-on nga unga angot kay Santa ukon “Babbo Natale” sa Italy.
Gindugang pa it opisyal nga ginkumpirma kana ni santa nga magagamit imaw it face mask ag igapabilin ro tamang distansiya agud nga maprotektahan ro anang kaugalingon ag maskin sin-o man nga anang makasalamuha.
Suno pa kana nga pwede man nga magbutang ro unga nga eaeaki it sangka bote it sanitizer sa idaeum it Christmas tree kaibahan ro gatas ag biscuit.
