Kallibo Aklan———Nagdangop sa taeatapan it Bombo Radyo ro sangka residente matapos nga maka-eksperyensiya it haeos adlaw-adlaw nga pagbaha sa sueod it andang panimaeay tuga it ginpatindog nga pader it eskwlehan maeapit sa barangay pavement it Brgy Camanci Norte, Numancia.
Suno sa tagreklamo nga si Lyn Revicente ag residente it nasambitan nga lugar nga perwisyo para sa pilang ka mga residente ro pagbuhos it tubi maghalin sa atop it andang barangay pavement.
Haeos katunga it bubong nga gina-agyan it tubig ulan ro naga-ilog nga naging rason it pagbaha sa sueod it andang panimaeay.
Gin-insister dugang nga raya hay nag-umpisa kat gin-paderan ro Camanci Elementary School ag owa eun it maeapsan ro tubi.
Bangud kara, ginmaso eun lang sigon nanda ro owa pa nahuman nga parte it pader agud nga may ma-agyan ro tubi ag mabawasan ro naga-ilog sa sueod it andang baeay bilang temporaryong solusyon sa pagbaha.
Una eun man sandang nagdangop sa andang Barangay apang ginpromisahan eamang nga pagataw-an it aksyon ro andang problema .
Samtang gapanindugan man kara nga mas kinahangean nanda makarun ro intsigidang aksyon it lokal nga gobyerno bangud sa sigidas nga pag-inuean.
Samtang ginpromisa man it Barangay Council sa Barangay Camanci Norte, Numancia nga andang pagatambakan it baeas ro palibot it eugta sa panimaeay it tagreklamo.
Pag-abot man sa barangay pavement hay anda sigon nga iga-renovate ro atop kara.
Suno pa kay Barangay Kagawad Ednel Sioco Sr. nga raya eamang ro andang temporaryong pagahimuon nga aksyon bangud indi magpasugot ro mga manugturo sa nasambitan nga eskwelahan nga buhuan ro andang pader.
