Health News ——Ginaeauman nga paga-umpisahan eon ro mass vaccination it milyun-milyong Pinoy sa Hunyo ukon Hulyo it masunod nga dag-on suno sa sangka opisyal it Department of Science and Technology (DOST).
Sa sangka public briefing, ginpahayag ni Philippine Council for Health Research Development (PCHRD) Executive Director Dr. Jaime Montoya, padayun ro ginapatigayon nga koordinasyon it gobyerno sa mga suppliers it COVID-19 vaccines.
Ko Biyernes hay nakaangkon it pirmahan ro gobyerno, private sector ag manufacturer nga AstraZeneca para sa sangka tripartite agreement nga magatau it access sa nasyon sa COVID-19 vaccines.
Ginpasiguro it gobyerno para sa unang supply deal it bakuna, nga makaangkon ro nasyon it 2.6 milyong shots it potensiyal nga COVID-19 vaccine nga na-develop it AstraZeneca.
Madumduman nga ginhambae ni vaccine czar Carlito Galvez Jr. nga masobra sa 35 milyong Pinoy ro pagataw-an it prayoridad agud nga makabaton it bakuna kontra sa COVID-19.
Paga-unahon ro pagtau it bakuna sa mga pigadong Pinoy kasunod ro mga priority sectors kapareho it mga healthcare workers, pulis, suldado ag iba pang essential workers it gobyerno ag business sector.
Ginpahayag pa ni Galvez nga ginakonsidera man nanda ro mga lugar nga may una nga masobra sa 3,000 aktibong kaso it COVID-19.
Suno pa kay Galvez, plano it gobyerno nga mataw-an it COVID-19 vaccine ro 20 milyon hasta 30 milyong Pinoy kada dag-on sa sueod it tatlo hasta limang dag-on .
Target pa it gobyerno nga mabakunahan ro 60 hasta 70 million sa masobra sa 100 milyong Filipino.
