Kalibo Aklan ——–Gin-umpisahan eon it lokal nga gobyerno it Kalibo ro distribusyon it mga prepaid wifi modem sa kapin sa 500 nga college students nga residente it banwang Kalibo.
Raya hay kasunod it ginlunsar nga Pandemic Educational Assitance for Kalibonhon ukon Project PEAK.
Suno kay Mr. John Marlou Salido, Kalibo Youth Development Officer II, nga target it rayang programa nga mataw-an it educational assiatance ro mga college students pinaagi sa pagtao kanda it prepaid wifi modem ag sang buean nga libreng load allowance.
Suno kana, nagpagguwa it kapin sa 750, 000 pesos nga pondo ro andang taeatapan.
Sa baylo nga cash assistant ro andang igatao sa mga benipisyaryo hay ginpakamayad sigon nanda nga ibakae eon lang raya it wifi modem agud nga makabulig sa mga estudyante.
Natueopangdan sigon nanda nga mabahoe makaron ro papel it internet connection sa pag-iskuyla it mga pamatan-on eabi pa ag padayun gihapon nga nagapanaeasa ro pandemya daea it COVID-19.
Ginapahayag nga ro benipisyaryo it Project PEAK hay mga Kalibonhon nga naka-enroll sa tanan nga University ag Colleges sa bilog nga probinsya it Aklan.
Kung sa siin, gintugyan sigon nanda sa mga eskwelahan ro responsibilidad sa pagpili it mga magiging benipisyaryo it programa.
Kaibahan sigon sa naging kwalipikasyon hay kung ro sangka estudyante hay may marka nga 2.0 pataas, indigent ukon miyembro it 4Ps ag may mga manghod pa nga naga-eskwela.
