Kalibo Aklan ——-Ninahan nga nagreport sa taeatapan it pulisya ro sangka eaeaki matapos nga mabun-an sa banwa it Banga bandang alas-6:45 kabie.
Ginkilaea ni Pssgt. Elmar Relente it Banga PNP ro biktimang si Jack Trazel Gumban, 24-anyos, residente it Brgy. Lapnag kaibahan si Marlo Peralta.
Samtang ro suspek hay ginkilaeang si Lito Isturis, 36-anyos ag residente it Brgy. Tabao sa nasambit nga banwa.
Si Gumban hay nakaangkon it lastro sa tuo nga kili kili ag iba pang parte it eawas.
Base sa inisyal nga imbestigasyon it pulisya, magkaibahan ro tatlo halin sa Brgy Tabao paadto kunta it banwa it Banga kat pag-abot sa prente it Aklan State University hay nawad-an it gasolina ro motorsiklo nga ginamaneho ni Isturis rason nga nagpahatod raya kay Gumban.
Apang, maeayo ro direksyon kara it ginapahatdan kana rason nga nakaangkon it diskusyon sa tunga it magtimbang nga parte hasta nga umabot sa punto nga ginbayo ni Gumban si Isturis.
Bilang baeos hay naggabot raya it siyaw ag ginbuno ro biktima.
Si Gumban hay insigida man nga gindaea sa Aklan Provincial Hospital kon sa siin imaw sa makaron naka-confine para sa anang nagakaigong pagbueong.
Nasayuran nga una sa idaeom ko impluwensya it aeak ro daywa kat matabo ro insidente.
