Balitang Espesyal——-Kon may ginahambae nga “may kwarta sa basura’’, mas nagapati ro mangingisdang si Narit Suwansang ng Nakhon it Thamarat province, Thailand, sa haeambaeunon nga “may milyun-milyong kwarta sa higku it balyena’’.
Sang adlaw samtang nga nagatikang ro 60-anyos nga si Narit sa Laem Talumphok beach sa nasambit nga probinsiya, may nataeupangdan imaw nga naga eutaw eutaw nga mabahoe ag nagadueaw nga bato ukon mineral sa dagat.
Kat ginhana nana nga boe-on hay nakibot imaw nga medyu mabug-at raya rason nga nagtawag imaw it igbata agud nga buligan imaw nga madaea raya sa anang baeay.
Kat kilohon hay naga-abot raya sa syen kilos.
Matapos nga magpangutana sa mga kaparehong mangingisda, nakaangkon imaw it teorya kun ano ro anang napueot.
Agud nga mapamatud-an ro anang espekulasyon, gin testingan nana nga sindihan ro bato gamit ro anang lighter.
Matapos nga magdukot ro kaeayo, natunaw raya nga matsa kandila ag nagpaguwa it mabaho nga hugum.
Dikara nana nakumpirma nga raya hay sangka Ambergris ukon higku it balyena.
Kilaea ro Ambergris bilang sangka sangkap nga ginabutang sa mga maeahaeon nga perfume bangud nga nakakabulig raya nga mas magbuhay ro hugum it sangka pahumot.
Nagabalor ro sang kilo it Ambergris sa balor nga $42,600 dollars ukon katumbas it P2 milyon pesos.
Sa makaron, pilang negosyante eon ro nagpakita it interes nga bak-eon raya kana apang ginpakamayad anay nana nga estudyuhan raya it mga marine biologists it mga sikat nga unibersidad sa Thailand agud nga masayuran ro matuod nga kantidad kara antes nga ibaligya.
