Health News——–Nagpaguwa it pahayag ro Department of Health (DOH) may kaangtanan sa posibleng maexperiensiyahan nga allergic reactions nga kaeabanan nga side effect eamang kon nagapabakuna ukon nagatau it bueong sa sangka tawo.
Raya ro naging explinasyon it DOH matapos mag-isyu ro United Kingdom it allergy warning para sa Pfizer-BioNTech COVID-19 vaccine nga gin-umpisahan nga gamiton para sa mass vaccinations makaron nga dominggo sa nasambit nga nasyon.
Sa nagtuhaw nga reports, daywang katawo eon ro naturukan it unang aprubado it vaccine para sa COVID-19 ro nakaexperiensiya it allergic reactions ag kinahangean nga insigidang boengon.
Sa pihak kara, natukiban nga puro may history ro daywang pasyente it allergic reactions.
Suno kay DOH undersecretary Maria Rosario Vergeire, raya ro rason kon ham-an nga ginapangutana anay it mga doktor kun ro sangka pasyente hay allergic sa pagkaon ukon drugs antes nga magtau it bueong ukon treatment.
Gindugang pa ni Vergeire, magkaiba ro nagiging epekto it bueong ukon vaccine sa kada tawo nga nagabaton kara.
Suno kana nga importante nga makaangkon it ginatawag nana nga “inclusion and exclusion criteria” para sa pagahimuon nga vaccinations.
Presente eon nga nagapatigayon ro gobyerno it pagtu-on para sa sangka confidential data agreement sa Pfizer sa posibleng negosasyon para sa sangka clinical trial ukon supply deal sa nasyon.
