Kalibo Aklan——Nagpanupod it food packs ro mga tawuhan it PNP-Highway Patrol Group ag Land Transportation Office (LTO) sa mga driver it pampublikong saeakyan sa may kahabaon it Osmena Ave., Brgy. Tigayon Kalibo .
Target it HPG ro mga drivers nga may kompletong dokumento sa andang pagbiyahe .
Suno kay P/Capt. Nathaniel Florendo, hepe it HPG-Aklan nga tuyo kara nga mataw-an it reward ro mga motoristang nagasunod sa batas trapiko.
Ro mga owa suno kana it drivers license hay ginapabuligan ni Engr. Marlon Velez, hepe it LTO-Aklan nga makabo-oe it lisensiya.
Kada dag-on suno kana hay nagapatigayon sanda it kaparehong programa pinaagi sa andang natipon nga pondo ag iba pang stakeholders .
Makabig suno kana nga ro drivers it mga pampublikong saeakyan hay mga frontliners nga nagaserbisyo sa mga commuters makaron nga tyempo nga may pandemya.
Nagpatigayon man sanda it inspeksyon sa mga naga-agi nga saeakyan agud nga masiguro nga nagasunod ro mga raya sa social distancing ag kun overloaded raya .
Apang ro mga nasita hay owa anay ginmultahan sa baylo hay gin-abisuhan kon ano ro mga dapat nga obrahon .
Samtang, ginkalipay man ni P/Capt Florendo ro naging reaksyon it mga drivers sa andang nabaton nga food packs nga eubus nanda nga ginpasaeamatan.
