KALIBO, Aklan—Ginkumpirma it Social Security System ukon SSS-aklan nga umpisa sa Enero 2021 hay magapatuman it one-percent nga pagtaas sa kada buean nga kontribusyon it mga miyembro kara.
Ginpaathag ni Ms. Stephanie Joy Espino, tagapaghambae it SSS-Aklan nga raya hay nagakahueugan nga magataas man ro benepisyo it mga miyembro partikular ro andang mabaton nga pension.
Ro kada buean sigon nga kontribusyon hay magataas it 13% sa masunod nga dag-on halin sa presenteng 12%.
Apang indi man maga-eampas sa gintaeana nga maximum monthly salary credit.
Bangud sa pagtaas it kontribusyon, magataas man ro minimum monthly salary credit sa 3,000 pesos halin sa 2,000 pesos samtang ro maximum monthly salary credit hay magasaka sa 25,000 pesos halin sa 20,000 pesos.
Ginpahayag dugang nga indi man maapektuhan ro minimum nga monthly salary credit it mga kabulig ag Overseas Filipino Workers members nga 1,000 pesos ag 8,000 pesos.
Samtang, gindugang pa kara nga maskin ro mga job orders it mga lokal nga gobyerno hay obligado nga magpa-miyembro makaron sa SSS bilang self-employed bangud nga bukon sanda it kwalipikado sa GSIS.
