Balitang Espesyal——-Kapareho sa Pilipinas, may nagkaeain-aeain nga klase it mga mueto ag maligno nga ginapatihan sa Indonesia, apang kapareho man iya, owa it makahambae kon matuod baea ro mga raya ukon tuga eamang it imahinasyon.
Ko nagtaliwan nga Disyembre 2020, naging viral ro CCTV footage it sangka hanging bridge sa Cipayung district, Depok City, West Java sa Indonesia bangud nga naboe-an kara ro sangka Kuntilanak nga nakaangkas sa nagatabok nga motorsiklo!
Sa pagpati it mga Indonesians, ro Kuntilanak hay mueto it owa nagalinong nga kaeag it sangka nabdos nga babaye nga naging biktima it makangieidlis nga krimen ukon namatay sa sangka grabeng aksidente.
Kilaea ro mga Kuntilanak nga nakasuksok it putting eambong ag nakatabon sa andang itsura ro mahaba nanda nga buhok.
Ginapatihan man nga naga-tigbaliw sa pispis ro mga raya agud nga magsuyop it dugo it mga babaying birhen.
Suno sa sangka residente nga nakakilaea sa eaeaking nagamaneho it motor nga gin-angkasan it Kuntilanak, nagpang-eupsi ag nagpaeanuka ro eaeaki matapos nga magtabok sa tulay ko gabi-i nga maboe-an ro CCTV footage.
Mag-eowas kara, mabuhay eon nga kilaea ro tulay nga raya eon ro ginakahadlukan it mga residente bangud nga kakaiba ro pamatyag sa kada magtabok idtu .
Owa man nagtau it pahayag ro mga opisyal sa nasambit nga lugar bangud nga owa sanda naila nga kahadlukan ro andang distrito ag maging kilaea ro lugar bilang ginapugaran it mga mueto.
