KALIBO, Aklan—Temporaryong ginpasaraduhan ro sangka establisimento komersiyal sa banwa it kalibo matapos nga ro mismong nagapanag-iya kara hay nagpositibo sa coronavirus disease 2019 (COVID-19).
Ro nasambit nga grocery store hay nahamtang sa tabok it Kalibo Shopping Center sa Dr. Gonzales St., Kalibo.
Suno kay Punong barangay Niel Candelario it Barangay Poblacion, Kalibo nga ro pasyente ro sambilog sa mga panibag-ong kumpirmadong kaso it deadly virus sa banwa it Kalibo.
Ro negosyante hay ginasugid nga nagbiyahe sa siyudad it Iloilo antes nga nakaangkon it flu like symptoms.
Bangud kara, nagtawag sigon raya sa barangay council kon ano ro mga dapat nga obrahon.
Ag ko Huwebes nga adlaw sigon nagguwa ro resultang nagpositibo imaw sa COVID-19.
Agud nga masigurong owa it contamination it virus, temporaryong ginpasarado ro bilog nga establisimento para ipaidaeum sa disinfection.
Ginmanduan man ro pamilya it pasyente ag mga trabahador nga mag self isolate anay bangud nga makabig sanda nga high risk contact.
Sa makaron hay nagapadayun ro contact tracing sa posibleng nakasalamuha kara.
