KALIBO, Aklan—Kasunod it nagahilapit eun lang nga selebrasyon it Kalibo Sr. Santo Niño ati-atihan festival 2021, uman nga nag-apela ro pamunuan it simbahan sa mga deboto nga magsunod sa ginapatuman nga health protocol samtang nagapanata sa kapiyestahan ni Sr. Santo Niño.
Suno kay Fr. Tudd Belandres, parish priest it Saint John the baptist Cathedral nga ro matuod nga mensahe it pagselebrar it ati-atihan festival hay ro pagtuo.
Sa pihak it maabo sigon nga matabong pagbag-o sa selebrasyon hay dapat nga maging mabaskog sa gihapon ro debosyon it publiko.
Magapadayun man ro santos nga misa apang 50 porsyento eamang it kapasidad ro pwedeng makasueod.
May mga misa man nga pagahimuon sa kada barangay agud malikawan ro pag-dueotdutan it mga tawo.
Samtang, gin-engganyo kara ro tanan nga magsund sa health protocol kapareho it pagsuksok it face mask ag face shield kamana man ro pag-obserba it physical ukon social distancing.
Kung may ginabatyag nga mga masakit hay mas mayad nga magpamati eun lang it misa pamaagi sa mga radyo ukon magpamantaw sa social media.
Nasayuran nga umpisa makarun hay bukas eun para sa tanan nga deboto ro imahe ni Sr. Santo Ninio nga ginbutang it simbahan agud pwedeng madu-aw it tanan para magpangamuyo.
Hugot man nga ginabawaean ro pagbuyot ukon pagpahid it mga bagay sa imahe it Santo.
Owa eun man it matabong paeapak kapareho it nakaangdan it publiko.
Samtang kanselado man ro prosisyon nga masaming ginahimo it simbahan.
