Kalibo Aklan ——–Nagahimas makaron it rehas sa Makato Police Station ro sangka 30-anyos nga eaeaki matapos nga ginhana nga laslason ro liog it sangka 19-anyos nga eaeaki sa banwa it Makato.
Ginkilaea ni Police Staff Sargent Rowel Montoya it Makato PNP ro suspek nga si Joseph Mationg, residente it Brgy. Calangcang sa nasambit nga banwa samtang ro biktima hay ginkilaeang si Patrick Franz San Miguel ag residente it Brgy. Agcawilan, Lezo.
Ginpahayag ni PSSgt. Montoya nga base sa andang imbestigasyon, nagabantay it tricycle si San Miguel pauli sa andang panimaeay halin sa sangka namatyan kat gulpi eamang imaw nga ginpaeapitan it suspek.
Kaangot kara, ginpaguwa sigon kara ro anang kutsilyo nga bitbit ag gulping gintutok sa liog it biktima nga insigida man nana nga nasagang.
Apang, nakadap-eot gihapon ro kutsilyo ag nakaangkon imaw it lastro.
Ginasugid nga bukon it magkakilaea ro daywa ag posible eamang nga nakursunadahan imaw it suspek bangud sa tuman kara nga kahilungon.
Si Mationg hay insigida man nga naaresto it mga kapulisan ag posibleng magapangatubang sa kasong frustrated homicide.
