KALIBO, Aklan–Hugut nga ginabantayan makaron ro kundisyon it sangka negosyante matapos nga ulihi eon kara nasayuran nga nagpositibo imaw sa COVID-19, apang naki-usyuso sa sunog nga nag-eontad sa Dr. Gonzalez Street Corner Pastrana Street, Poblacion Kalibo ko Huwebes nga adlaw.
Suno kay Punong Barangay Neil Candelario it Poblacion, Kalibo nga matapos nga makabatyag it sintomas halin sa anang pagbiyahe sa siyudad it Iloilo, ginlaygayan raya it Municipal Health Office ukon MHO-kalibo nga mag-home quarantine hasta nga owa pa nagguwa ro resulta it anang swab test.
Apang natiempo nga kat magguwa ro resulta nga positive imaw hay nasip-eatan ro anang presensiya sa sunog nga nag-eontad maeapit sa ginapanag-iyahan nga establisimento komersiyal.
Gindugang pa ni kapitan Candelario nga ro mga tawo nga may high risk contact sa pasyente partikular ro anang pamilya hay ginboe-an eon man it swab samples ag naka-isolate.
Agud nga masigurong owa it contamination it virus, temporaryong ginpasarado ro bilog nga establisimento para ipaidaeum sa disinfection.
Ginmanduan man ro anang mga trabahador nga mag self isolate anay.
Suno sa negosyante nga nagguwa imaw it andang building bangud sa pagkabaeaka sa sitwasyun it sunog nga natabu.
