Kalibo Aklan ——–Ginklaro it Human Resource Department it Aklan Provincial Capitol nga owa eun it mabatun pa nga 5,000 pesos nga dugang sa anang bonus si Mr. Ricky Pinos ag nagatrabaho bilang sangka utility sa Dr. Rafael S. Tumbokon Memorial Hospital.
Base sa pahayag ni Bheng Santa Maria, Head it Provincial HR Deparmtent sa Aklan Provincial Capitol nga owa nagsumite it mga requirements it HR Department sa nasambitan nga ospital si Pinos rason nga owa naeakot ro anang pangaean sa mga makabatun it dugang nga 5,000 pesos sa andang bonus nga dapat hay magabatun it insaktong 10,000 pesos.
Nasayuran nga owa nagsumite it anang Individual Performance Commitment Review (IPCR) si Pinos.
May mga alegasyon pa nga maabo ro nagareklamo sa performance kara bangud sa sigon hay pagiging tamad ag gina-aywanan ro anang trabaho matapos nga makatime-in.
Sa pihak kara, nagpanidugan man si Mr. Ricky Pinos nga owa imaw it ginbayolar sa anang trabaho.
Gin-insister pa kara nga nagatrabaho imaw it mayad.
Nagakaduea manlang sigon imaw kung may ginasugo kana.
Dugang pa kara nga kat nagpaidaeum imaw sa 6 nga adlaw nga home quarantine pagkatapos nga magpacheck-up sa anang doktor hay nagfile imaw it leave of absence ag nagpakita it quarantine certificate bilang pamatu-od.
Bangud kara nagapati imaw nga owa it kung ano man nga rason agud nga i-hold ukon indi imaw makabatun it anang bonus.
