KALIBO, Aklan—Nagapamayad eon sa Aklan Provincial Hospital ro daywang pari nga nagpositibo sa Coronavirus Disease 2019 (COVID-19).
Ginkumpirma ni Reverend Father Joseph Christian Indadano, chancellor it Diocese of Kalibo, ko nagtaliwan nga domingo pa naeakip sa listahan it positive cases ro daywang pari nga ginakabig nga mga local case.
Ruro Aklanon ro mga raya, kun sa siin ro sambilog hay nakadestino sa isla it Boracay bilang parochial vicar it Parish Church of Our Lady of the Most Holy Rosary sa Barangay Balabag.
Dugang pa kara nga ginpaidaeum eon sa RT-PCR tests ro 6 nga pari ag tatlong empleyado it simbahan nga nakasalamuha it pari ag sa mayad nga swerte hay nag-negatibo ro mga raya.
Sa pihak nga parte, naka-Facebook live ro mga ginapatigayon nga misa sa Saint Joseph the Worker Parish sa banwa it Numancia matapos nga magpositibo man sa COVID-19 ro pari nga nakadestino kara ag sa kaiping nga Sto. Niño Seminary nga insigidang gin-lockdown.
Ginahueat pa ro resulta it swab tests it waeong nakasalamuha kara nga presenteng naka-isolate man.
