KALIBO, Aklan—Ginkalipay it Simbahang Katolika ro madinaeag-eon nga pagsaueog it kapistahan ni Sr. Sto. Niño de Kalibo.
Suno kay Reverend Father Tudd Belandres it St. John the Baptist Cathedral nga mag-eowas nga gintaw-an it manami nga tiempo hay kabilugan nga naging matawhay ro selebrasyon.
Gindugang pa kara nga naging “blessing in disguise” ro pagtama it Coronavirus Disease 2019 ukon COVID-19 bangud nga natuman ro mabuhay eon nga handum nga mataw-an it atensyon kada Ati-Atihan Festival ro religious aspect partikular ro pagpasaeamat sa batang Hesus.
Mag-eowas nga owa it aeak ag gulo, naging masinueundon man suno ro mga deboto sa ginapatuman nga health protocols eabi eon ro pagsunod sa physical distancing.
Aminado man si Fr. Tudd nga nakaangkon it sangkiri nga aberya pagkatapos it misa kat magkasinadya ro mga deboto sa pagkabati it tamboe , apang natigayon man eagi raya nga maayos.
Angot kara, ginpasaeamatan ni Fr. Tudd ro suporta, partisipasyon ag kooperasyon it lokal nga gobyerno, mga deboto, mga katapo it media, volunteers ag maabu nga iba pa sa malinong ag maayos nga selebrasyon it kapistahan.
